“بيتهموني إني عايزة أبقى تريند”.. كيف ردت عفاف مصطفى؟


01:41 م


الجمعة 18 نوفمبر 2022

كتب- هاني صابر:

ردت الفنانة عفاف مصطفى، على الاتهامات التي وجهت إليها من بعض رواد مواقع التواصل الإجتماعي، بأنها تُريد ركوب التريند بعد أزمتها الأخيرة مع مهرجان القاهرة السينمائي وعدم دعوتها للحضور.

وكتبت عفاف، عبر حسابها على “فيسبوك”: “أقسم برب الكون اتصلوا بيا برنامجين عشان أظهر فيهم إمبارح والنهاردة نتكلم عن المهرجان، وقالي نلحق الهوجة ورفضت، والله شاهد”.

وأضافت: “بقول الكلام ده للأفاضل بزيادة، اللي بيتهموني إني عايزة أبقى تريند”.

وكانت الفنانة عفاف مصطفى، أكدت عدم دعوتها لحضور مهرجان القاهرة السينمائي في دورته الحالية الـ 44.

وقالت عفاف، في تصريحات خاصة لـ “مصراوي”: “والله أنا شفت إنهم داعيين ناس لا تمت بصلة نهائي للفن، اللي جايب قريبه واللي جايب المهندس، واللي جايب الدكتور بتاعه اللي بيعالجه، واللي جايب جاره، لكن الفنانين إحنا ناس أعضاء نقابة، وبعدين أنا جميع المهرجانات بروحها، اللي حصل ده إن محدش بعتلي دعوة، فمش فاهمه ليه؟”.

وتابعت: “وبعدين هزعل ليه يعني؟ .. الفستان موجود والمهرجانات على قفا مين يشيل.. أنا عملت الفستان اللي قبله بتاع مهرجان الدراما مكلفني بتاع 16 ألف جنيه، و7 آلاف اللي عملت بيهم الفستان الجديد عشان المهرجان، قولت يلا دول ولا حاجة”.

وأوضحت، أن الفنانات لم يلتزمن بالـ “دريس كود” الذي أعلن عنه الفنان حسين فهمي لحضور مهرجان القاهرة السينمائي في دورته الـ 44 ، قائلة: “الناس كلها لبست على مزاجها وراحتها.. الفساتين عادية ومبهرة وجميلة، مفيش حد إلتزم باللي قال عليه، ولا كلامي مش مظبوط؟، وكلها (كوبي) من الأزياء اللي بنلبسها في المهرجانات التانية”.

وأضافت: “وشيء طبيعي إن المهرجان يكون عايز لبس مبهر، لإن احنا ناس فنانين، ولازم الناس تشوف لبسنا على آخر صيحة، ونواكب أزياء دول العالم.. هو إحنا أقل من دول العالم يعني، نواكبهم في اللبس والتنظيم، إحنا مش أقل منهم، ومحدش التزم بالدريس كود، وده اللي شفته”.

عفاف مصطفى كتبت تدوينة سابقة عبر حسابها الشخصي بموقع فيسبوك، قالت فيها: فصلت فستان بسيط كلفني 7 آلاف جنيه على قد إمكانياتي لحضور مهرجان القاهرة السينمائي الـ 44، عشان أفرح وسط زملائي، ولكن أستاذ حسين فهمي لم يرسل لي دعوة وأول مرة يحصل كده، ليه كده يا حسين”.

يذكر أن، عفاف مصطفى، تصور حاليا دورها في مسلسل “رمضان كريم”، وشاركت في الماراثون الرمضاني الماضي من خلال مسلسل “أحلام سعيدة” بطولة الفنانة يسرا.